لاہور: (ویب ڈیسک) نواسہ رسول حضرت امام حسینؓ اور ان کے جانثاروں کو سلام عقیدت پیش کرنے کیلئے ملک بھر میں یوم عاشور عقیدت و احترام کے ساتھ منایا گیا، اس سلسلے میں سکیورٹی کے سخت انتظامات کئے گئے ۔
ملک کے تمام چھوٹے بڑے شہروں اور قصبوں میں ذوالجناح کے جلوسوں اور مجالس عزا کا انعقاد ہوا، جن میں حضرت امام حسینؓ کی قربانیوں کا ذکر اور شہدائے کربلا کی عظمت کو اجاگر کیا گیا اور عزاداروں کی جانب سے غم حسین میں نوحہ خوانی اور عزاداری کی گئی۔
لاہور
لاہور میں یوم عاشور کا مرکزی جلوس نثار حویلی سے برآمد ہوا، جلوس اپنے مقررہ راستوں ہوتا ہوا امام بارگاہ کربلا گامے شاہ پہنچ کر اختتام پذیر ہوگیا جہاں عزاداروں نے نماز مغربین ادا کی۔
تاریخی نثار حویلی سے نکلنے والے عاشورہ کے جلوس میں شامل عزادار ماتم داری اور نوحہ خوانی سے حضرت امام حسین رضی اللہ تعالیٰ عنہ اور ان کے ساتھ شہدا کو پرسہ دیا، شرکا نے امام حسینؓ اور ان کے رفقا کی لازوال قربانی کو خراج عقیدت بھی پیش کیا۔
قبل ازیں وفاقی وزیر داخلہ محسن نقوی نے نثار حویلی کا دورہ کیا اور سکیورٹی انتظامات کا جائزہ لیا۔
کراچی
کراچی میں یوم عاشور کا مرکزی جلوس نشتر پارک سے برآمد ہوا جس میں عزاداروں کی بڑی تعداد شریک تھی، شرکا نے تبت سینٹر ایم اے جناح روڈ پر نماز ظہرین ادا کی، جلوس اپنے مقررہ راستوں سے ہوتا ہوا حسینیہ ایرانیان امام بارگاہ کھارادر میں اختتام پذیر ہوگیا۔
راولپنڈی
راولپنڈی میں یوم عاشور کا مرکزی جلوس امام بارگاہ عاشق حسین سے بر آمد ہوا، تحریک نفاذ فقہ جعفریہ کے علامہ حسین نے تبرکات کی زیارت کے بعد جلوس برآمد کرایا، جو مقررہ راستوں سےہوتا ہوا واپس امام بارگاہ میں اختتام پذیر ہوگیا۔
ملتان
ملتان میں استاد اور شاگرد کے قدیمی تعزیوں سمیت 100 سے زائد جلوس برآمد ہوئے، عزاداروں کی جانب سے غم حسین میں نوحہ خوانی اور عزاداری کی گئی، جلوس اپنےمقررہ راستوں سےہوتا ہوا اپنی منزل پراختتام پذیر ہوا۔
خیال رہے استاد پیر بخش اور شاگرد مقمع الدین کے تعزیے کی تاریخ صدیوں پر محیط ہے جن کو یوم عاشور پر پاک گیٹ سے برآمد کیا جاتا ہے، استاد کے تعزیے کا وزن 70 من اور شاگرد کے سات منزلہ تعزیے کا وزن ایک سو بیس من ہوتا ہے۔
پشاور
پشاور میں یوم عاشور کا پہلا مرکزی ماتمی جلوس امام بارگاہ سید رضوی شاہ سے برآمد ہو کر اپنے روایتی راستوں پیپل منڈی، قصہ خوانی سے ہوتا ہوا محلہ خداداد پہنچا اور امام بارگاہ آغا مصطفے شاہ پر اختتام پذیر ہوگیا۔
کوئٹہ
کوئٹہ میں یوم عاشور کا مرکزی جلوس علمدار روڈ سے برآمد ہوا جو اپنے مقررہ روٹ سے ہوتا اپنی منزل پر پہنچ کر اختتام پذیر ہو گیا،اس موقع پر کوئٹہ سمیت بلوچستان کے 7 اضلاع میں موبائل فون اور انٹرنیٹ سروس معطل رہی۔
آزاد کشمیر
میرپور آزاد کشمیر میں مرکزی جلوس مرکزی امام بارگاہ بیت الحزن سے برآمد ہونے والا جلوس بھی اپنی منزل پر پہنچ کر اختتام پذیر ہوگیا جب کہ مظفرآباد میں مرکزی امام بارگاہ پیر علم شاہ بخاری سے برآمد ہونے والا ماتمی جلوس بھی اپنے مقررہ روایتی راستوں پر ہوتا ہوا واپس امام بارگاہ پہنچ کر اختتام پذیر ہوا، جلوس کی حفاظت کیلئے پولیس کی بھاری نفری اورحسینی رضا کار بھی سکیورٹی پر مامور تھے۔
ملک بھر میں 4 ہزار 836 جلوس نکالے گئے
دوسری جانب وزارت داخلہ کے مطابق یوم عاشور پر آج پورے ملک میں 4836 جلوس نکالے گئے جب کہ 5480 مجالس ہوں گی، 1301 علاقے انتہائی حساس قرار دیے گئے تھے۔
وزیر داخلہ محسن نقوی، وزیر مملکت طلال چودھری اور سیکرٹری داخلہ خرم آغا مرکزی مانیٹرنگ سیل کے ذریعے لمحہ بہ لمحہ صورتحال مانیٹر کر رہے تھے، اسلام آباد میں قائم مرکزی مانیٹرنگ سیل کا صوبائی حکومتوں کے کنٹرول رومز سے مسلسل رابطہ رہا اور اطلاعات کا تبادلہ ہوتا رہا۔
وزارت داخلہ کے مطابق وزیراعظم شہباز شریف کو ملک بھر میں امن و امان کی صورتحال سے مسلسل آگاہ کیا گیا، اسلام آباد میں آج 54 مجالس اور 12 جلوس جبکہ پنجاب میں 2502 مجالس اور 3025 جلوس نکالے گئے۔
سندھ میں عزادار 1040 مجالس ، 1039 جلوس اور خیبرپختونخوا میں 735 مجالس و 257 جلوس نکالے گئے، بلوچستان میں 32 مجالس، 24 جلوس، گلگت بلتستان میں 1070 مجالس، 141 جلوس اور آزاد کشمیر میں 47مجالس جبکہ 41 جلوس نکالے گئے۔
سکیورٹی ہائی الرٹ
اس موقع پر پولیس اور سکیورٹی اداروں کی جانب سے سکیورٹی کے خصوصی انتظامات کئے گئے اور کسی بھی ناخوشگوار واقعے سے بچنے کیلئے جلوس کے مقرر کردہ راستوں پر موبائل اور انٹرنیٹ سروس بند رکھی گئی تھی۔
یاد رہے کہ گزشتہ روز 9 ویں محرم الحرام کی مناسبت سے مجالس منعقد اور جلوس برآمد ہوئے، کراچی میں نشتر پارک سے برآمد ہونے والا مرکزی جلوس حسینہ ایرانیاں کھارادر پہنچ کر اختتام پذیر ہوا جس میں عزاداروں کی کثیر تعداد نے شرکت کی، جلوس کی گزر گاہوں پر سکیورٹی کے سخت انتظامات تھے۔
لاہور میں 9 ویں محرم کا مرکزی جلوس مقررہ راستوں سے ہوتا ہوا پانڈو سٹریٹ پہنچ کر ختم ہوگیا، عزا داروں نے غم حسین میں نوحہ خوانی اور عزا داری کی، لاہور کے علاوہ پشاور، کوئٹہ، راولپنڈی اور دیگر شہروں میں بھی مرکزی جلوس برآمد ہو کر اپنی منزل پر پہنچ کر اختتام پذیر ہوئے۔
