پشاور۔ڈیلی ٹائمز(ویب ڈیسک) خیبرپختونخوا میں پرائیویٹ اسکولز ریگولیٹری اتھارٹی نے نجی اسکولوں کو موسم سرما کی تعطیلات کے دوران امتحانات کے انعقاد سے منع کر دیا ہے۔ تفصیلات کے مطابق 26 دسمبر کو جاری کردہ ایک باضابطہ نوٹیفکیشن میں، اتھارٹی کا کہنا تھا کہ مشاہدہ کیا گیا ہے کہ کچھ نجی اسکولوں نے موسم سرما کی تعطیلات کے دوران امتحانات کے شیڈول کا اعلان کیا تھا
جو دی گئی ہدایات کی خلاف ورزی ہے۔ پرائیویٹ اسکولز ریگولیٹری اتھارٹی نے تمام نجی اسکولوں کو ہدایت کی کہ وہ اس مدت کے دوران طے شدہ امتحانات کو فوری طور پر منسوخ کردیں۔ نوٹیفکیشن میں خبردار کیا گیا ہے کہ احکامات پر عمل درآمد نہ کرنے کی صورت میں پرائیویٹ اسکولز ریگولیٹری اتھارٹی ایکٹ 2017 کے تحت قانونی کارروائی عمل میں لائی جائے گی۔
اتھارٹی نے اس بات کا اعادہ کیا کہ کسی بھی نجی اسکول یا انسٹی ٹیوٹ کو موسم سرما کی تعطیلات کے دوران امتحانات منعقد کرنے کی اجازت نہیں ہے اور اس بات پر زور دیا کہ پہلے جاری کردہ تمام رہنما خطوط پر بغیر کسی استثناء کے عمل کیا جانا چاہیے۔
دریں اثنا، خیبرپختونخوا حکومت نے پہلے ہی سرکاری اور پرائیویٹ اسکولوں کے لیے موسم سرما کی تعطیلات کا اعلان کر دیا ہے۔ سمر زونز میں واقع اسکول یکم جنوری سے 15 جنوری تک بند رہیں گے، جب کہ سرمائی علاقوں میں واقع تعلیمی ادارے 22 دسمبر 2025 سے 28 فروری 2026 تک بند رہیں گے۔
